ચંદન ડ્રાય અને ઓઈલી બન્ને પ્રકારની ત્વચા માટે ગુણકારી છે. તે ત્વચાની રંગતને નિખારે છે અને એન્ટી બેક્ટેરિયલ હોવાથી ખીલ- ફોડકી દૂર કરી ત્વચાને બેદાગ બનાવે છે. તમે થોડા ચંદન પાઉડરમાં 2 ચમચી ગુલાબજળ ભેળવી તેનો ફેસપેક બનાવીને ચહેરા પર લગાવી શકો છો. જો ઈચ્છો તો નહાતા પહેલાં ચહેરા પર ચંદન કે સુખડના તેલથી માલિશ કરો. આનાથી ચહેરા પરની કરચલીઓ પણ દૂર થશે અને ત્વચા કાંતિવાન બનશે.
લોટસ ફ્લાવર એક્સ્ટ્રેક્ટ્સમાં એન્ટી ઓક્સિડન્ટ્સ હોય છે. તે ત્વચાને મોઈશ્ચર પ્રદાન કરી તેને અંદરથી પોષણ આપે છે, જેનાથી ત્વચાનું સ્વાસ્થ્ય નિખરે છે. તેમાં રહેલ એમિનો એસિડ્સ ત્વચામાં કસાવ લાવે છે અને ત્વચાને લવચીક બનાવે છે.
કેસર એ વિટામિન્સ અને એન્ટી ઓક્સિડન્ટ્સથી સમૃદ્ધ છે. આપણે ત્યાં હજારો વર્ષથી કેસરનો સૌંદર્યવર્ધક તરીકે ઉપયોગ થતો આવ્યો છે. કેસર ત્વચાને સુંદર, સ્વસ્થ અને મુલાયમ બનાવે છે અને ત્વચાની રંગતને નિખારે છે. કાચા દૂધમાં કેસરના થોડા તાંતણા ભેળવી રૂની મદદથી આ ઘોળને આખા ચહેરા પર લગાવો. 15 મિનિટ પછી ઠંડા પાણીથી ચહેરો ધોઈ નાંખો. જો તમારી ત્વચા ડ્રાય હોય તો એક ચમચી મધમાં કેસરના થોડા તાંતણા નાંખી તેનાથી ચહેરા પર હળવા હાથે મસાજ કરો અને પછી દસ મિનિટ રહેવા દો. ત્યારબાદ હૂંફાળા પાણીથી ચહેરો ધોઈ નાંખો.
દૂધમાં રહેલ લેક્ટિક એસિડ ત્વચા પરના મૃત કોષો, મેલ વગેરે દૂર કરી ત્વચાને બેદાગ બનાવે છે. તે ઉત્તમ મેકઅપ રિમુવર છે. તે ત્વચા પરની કરચલીઓને પણ ઓછી કરી વાર્ધક્યને દૂર ઠેલે છે. તે ત્વચાને મોઈશ્ચરાઈઝ કરી તેને નમી પ્રદાન કરે છે. કાચા દૂધને કોટન બોલની મદદથી ચહેરા પર લગાવો. દસ મિનિટ પછી પાણીથી ચહેરો ધોઈ નાંખો.
તલના તેલમાં વિટામિન ઈ અને વિટામિન બી રહેલ છે, જે તમારી ત્વચાને દુરસ્ત કરી તેને મખમલ જેવી સુંવાળી બનાવે છે. તે સૂરજના અલ્ટ્રાવાયોલેટ કિરણો સામે ત્વચાને નૈસર્ગિક રીતે સુરક્ષા પ્રદાન કરે છે. 2 ટેબલસ્પુન તલના તેલામાં 2 ટેબલસ્પૂન એપલ સિડાર વિનેગર અને એક ચમચી પાણી ભેળવી ઘોળ બનાવો. કોટન બોલની મદદથી આ ઘોળને ચહેરા પર લગાવો. 15 મિનિટ પછી હૂંફાળા પાણીથી ચહેરો ધોઈને સાફ કરી લો.
મંજિષ્ઠ એ ત્વચાને સાફ કરી તેને પોષણ આપે છે. મંજિષ્ઠમાં લાલ ચંદન પાઉડર અને દૂધ ભેળવીને ફેસ પેક બનાવો અને ચહેરા પર લગાવો. ફેસપેક સૂકાવા લાગે એટલે ઠંડા પાણીથી ચહેરો ધોઈ નાંખો. આ ફેસપેક ત્વચાને ડિટોક્સ કરે છે અને ત્વાચાને બેદાગ બનાવી તેની રંગત નિખારે છે.
નવગુજરાત સમય
ફેરફાર કરાયાની છેલ્લી તારીખ : 5/23/2020