કેળાં સ્વાસ્થ્ય સુધારે, સૌંદર્ય નિખારે

કેલ્શિયમથી સભર કેળાં એ સ્વાસ્થ્ય માટે તો ઉત્તમ છે જ પણ તે સૌંદર્યની માવજત માટે પણ અનેક રીતે ઉપયોગી છે. લગભગ આખું વર્ષ મળી રહેતા કેળાં સ્કીન અને હેર માટે ઉત્તમ બ્યુટી ટોનિક છે. આવો, જાણીએ તેના લાભ.

• કેળાં વિટામીન સી અને વિટામીન બી-૬નો ઉત્તમ સ્ત્રોત છે. જે તમારી સ્કીનને સપલ અને ઈલાસ્ટીક રાખે છે. વળી તે તમારી સ્કીનને અકાળે પડતી કરચલીઓથી પણ બચાવે છે.
• કેળાં એ ઉત્તમ મોઈશ્ચરાઈઝર છે. પાકેલાં કેળાંનો છૂંદો કરી તેને તમારા ચહેરા પર લગાવો અને હળવા હાથે મસાજ કરી વીસ મિનિટ સુધી રહેવા દો. ત્યાર બાદ ચહેરો ઠંડા પાણીથી ધોઈ નાંખો. તમારા ચહેરાની ત્વચા રેશમ જેવી સુંવાળી બની જશે.
• જો તડકાને કારણે સ્કીન પર પિગમેન્ટેશન થઈ ગયું હોય તો કેળાંના પલ્પમાં એક ચમચી દહીં ઉમેરીને ચહેરા પર લગાવો. થોડા દિવસ નિયમિતપણે આ પ્રયોગ કરવાથી પિગમેન્ટેશન દૂર થશે. ત્વચા પરના દાગ-ધબ્બા પણ દૂર થશે.

કેળાં: સ્વાસ્થ્ય સુધારે, સૌંદર્ય નિખારે

કેળાં એ ઉત્તમ સ્ક્રબ પણ છે. પાકેલાં કેળાંની પેસ્ટ કરી તેમાં થોડી ખાંડ ભેળવો અને પછી હળવા હાથે, જ્યાં સુધી ખાંડ ઓગળી ન જાય ત્યાં સુધી, ચહેરા પર સ્ક્રબ કરો. આનાથી તમારા ચહેરા પરની ત્વચાના મૃત કોષો દૂર થશે અને ત્વચા તાજગીભરી, ચમકીલી બની જશે.

• શું તમારા હાથ અને પગની ત્વચા રૂક્ષ બની ગઈ છે? તો કેળાંના પલ્પમાં થોડું ગુલાબજળ ભેળવી તેને હાથ અને પગ પર લગાવો. પંદર મિનિટ પછી પાણીથી ધોઈ નાંખો. ત્વચા મુલાયમ બની જશે.
• પાકેલાં કેળાંનો માવો કરી તેમાં થોડું દહીં, અડધી ચમચી મધ અને એક ચમચી બદામનો ભૂકો ઉમેરો. આ ફેસ પેકને ચહેરા પર લગાવી વીસ મિનિટ રહેવા દો અને ત્યારબાદ ઠંડા પાણીથી ચહેરો ધોઈ નાંખો. તમારી ત્વચા પર સુંદર ગ્લો આવી જશે. આ પેક એન્ટી એજિંગ છે, મધ ઉત્તમ મોઈશ્ચરાઈઝર છે, બદામમાં આવેલ વિટામિન ઈ ત્વચા પરની કરચલીઓ દૂર કરે છે, દહીં ત્વચા પરના દાગ-ધબ્બા દૂર કરી તેને સુંવાળી બનાવે છે તો કેળાં સ્કીનને સપલ રાખે છે.

હેર પેક

• કેળાં એ ઉત્તમ હેર પેક છે. એક પાકાં કેળાનો છુંદો કરી તેમાં એક ચમચો ઓલિવ ઓઈલ અને એક ચમચી મધ ઉમેરી બરાબર મિક્સ કરો. આ પેકને વાળ ઉપર લગાવી અડધો કલાક રહેવા દો. ત્યાર બાદ શેમ્પૂથી વાળને ધોઈ નાંખો. વાળ સુંદર, ચમકતાં, સુંવાળા બની જશે.

સ્ત્રોત : બ્યુટિ કેર