આપણા શરીરમાં કુદરતી રીતે ઉત્પન્ન થતા તૈલી પદાર્થનું રાસાયણિક માળખું ઓલિવ ઓઈલ સાથે મળતું આવે છે. આ જ કારણથી અનેક સૌંદર્ય પ્રસાધનોમાં તેનો મુખ્ય ઘટક તરીકે ઉપયોગ કરવામાં આવે છે. જો તમારી ત્વચા શુષ્ક હોય તો તમારા માટે ઓલિવ ઓઈલ એકદમ યોગ્ય છે. તે ત્વચાના છિદ્રો વાટે અંદર સુધી પહોંચે છે અને ત્વચાને પોષણ આપે છે. ઓલિવ ઓઈલની અન્ય એક ખૂબી એ છે કે તેમાં હાઈડ્રોક્સીટાયરોસીલ નામનું તત્વ હોય છે, જે એન્ટી એજિંગ એટલે કે વૃદ્ધત્વને દૂર રાખવાનો ગુણધર્મ ધરાવે છે.
તમે આ મહિને સ્પા ટ્રીટમેન્ટ લઈ શકો એમ ન હો તો શું કરશો? તો તમે તમારી ત્વચાની સંભાળ ઘરે પણ લઈ શકો છો. બે ચમચા ઓલિવ ઓઈલમાં એક ચમચી ખાંડ ભેળવો અને આ મિશ્રણને તમારી ત્વચા પર લગાવો. ત્વચા પર હળવા હાથે મસાજ કરો. તેનાથી ત્વચાની શુષ્કતા દૂર થશે અને તે રેશમ જેવી સુંવાળી બનશે.
ઓલિવ ઓઈલ દ્વારા સન બર્નની સમસ્યાનો પણ ઉકેલ લાવી શકાય છે. પાણી અને ઓલિવ ઓઈલને સમાન માત્રામાં મિશ્રિત કરી ચહેરા પર મસાજ કરવાથી સન બર્નથી થતી તકલીફ દૂર થાય છે.
ઓલિવ ઓઈલ અનેક રીતે ગુણકારી છે. તેમાં સ્ક્વેલીન હોય છે જે ત્વચાની લવચિકતામાં વધારો કરે છે. ઓલિવ ઓઈલને સી સોલ્ટ સાથે ભેળવીને ચહેરા પર મસાજ કરવાથી ત્વચાના મૃત કોષો નીકળી જશે અને ત્વચા ખીલી ઉઠશે.
જો તમારા નખ બટકણા હોય અને વારંવાર તૂટી જતા હોય તો એક મોટા કટોરામાં ઓલિવ ઓઈલ લો અને તેમાં થોડા લીંબુના ટીપાં નાખીને એ મિશ્રણમાં ૧૫ મિનિટ સુધી તમારી આંગળીઓને બોળી રાખો. આવું દર સપ્તાહે કરો. નેઈલ પોલિશ કર્યા બાદ સહેજ ઓલિવ ઓઈલ લગાવો. તે સુકાયા પછી તમે જોશો કે તમારા નખ ચમકી ઉઠશે.
જો તમારા વાળ શુષ્ક હોય તો તમે મધ અને ઓલિવ ઓઈલના મિશ્રણનો ચોક્કસ ઉપયોગ કરો, જેનાથી વાળનું તેના મૂળ સુધી કંડિશનીંગ થશે. તેનો વધુ એક અનોખો ઉપયોગ પણ છે. ઓલિવ ઓઈલને તમારા રેગ્યુલર કંડિશનરમાં એક મોટી ચમચી જેટલા પ્રમાણમાં ભેળવો અને શેમ્પૂ કર્યા પછી તે લગાવો.
આંખો ખૂબ સંવેદનશીલ છે તેથી તમે જ્યારે આઈ મેકઅપ દૂર કરતા હો ત્યારે પૂરતી કાળજી રાખવી જરૂરી છે. એ માટે કેમિકલ્સનો ઉપયોગ કરવાના બદલે ઓલિવ ઓઈલની પસંદગી કરો. તેનાથી તમારો મેકઅપ તો આસાનીથી દૂર થશે જ પણ તેની સાથે તમારી આંખોની આસપાસની ત્વચાને જરૂરી પોષણ પણ મળશે. ઓલિવ ઓઈલમાં રહેલ એન્ટી એજિંગ અને એન્ટી-ઈનફ્લેમેટરી ગુણધર્મો તમારી ત્વચાને રાહત આપે છે.
આ ઉપરાંત તમારા આઈલેશીસ અને આઈબ્રોને વધુ ડાર્ક બનાવવા માટે મસ્કારાના સ્થાને પણ ઓલિવ ઓઈલનો ઉપયોગ કરી શકાય છે.
જો તમે હોઠ સુકાઈ જવાની કે હોઠ ફાટી જવાની સમસ્યાથી છૂટકારો મેળવવા ઈચ્છતા હો તો તમારે માત્ર ઓલિવ ઓઈલ સહેજ હોઠ પર લગાવવાનું જ છે. ઓલિવ ઓઈલ હોઠને સુંવાળા બનાવે છે.
એક ચમચી ઓલિવ ઓઈલમાં થોડી ખાંડ મેળવો અને તેને હળવા હાથે હોઠ પર રગડો. ખાંડથી ત્વચાની શુષ્કતા દૂર થશે અને ઓલિવ ઓઈલ તમારા હોઠને પોષણ આપશે.
ઓલિવ ઓઈલમાં વિટામિન-ઈ સામેલ હોય છે જે તમારી ત્વચા અને હોઠને સૂર્યના અલ્ટ્રાવાયોલેટ કિરણો સામે રક્ષણ આપે છે.સ્ત્રોત: સ્ત્રોત: બ્યુટીકેર, ફેમિના
ફેરફાર કરાયાની છેલ્લી તારીખ : 6/26/2020