ઉંમરની સૌથી પહેલી અસર સ્કીન પર વર્તાય છે. ત્રીસીમાં પ્રવેશતાં જ ચહેરાની ત્વચા પર ઝીણી રેખાઓ પડવાની પ્રક્રિયા શરૂ થઈ જાય છે. પ્રદૂષણ, ક્લાઈમેટ ચેન્જ, સૂરજનો આકરો તાપ, ચિંતા, સ્ટ્રેસ, અપૂરતી ઊંઘ, અયોગ્ય ખાનપાન - આ બધું આપણી ત્વચાને નુકસાન પહોંચાડે છે અને તેને નિસ્તેજ બનાવે છે. પરંતુ સમયાંતરે ફેશિયલ ટ્રીટમેન્ટ કરાવતા રહેવાથી ત્વચા લાંબા સમય સુધી યુવા, હેલ્ધી અને સુકોમળ રહે છે.
આજકાલ અનેક પ્રકારની ફેશિયલ ટ્રીટમેન્ટ ઉપલબ્ધ છે. સ્કીનના પ્રકાર અનુસાર કયું ફેશિયલ કરાવવું, કેટલા સમયનાં અંતરે કરાવવું, ફેશિયલ કરાવ્યા પછી શું સાવચેતી રાખવી, આ બધી બાબતો અંગે પૂરતી જાગૃતિ હોવી જરૂરી છે. આમ ન હોય તો, ક્યારેક એવું પણ બને છે કે ગમે તેટલી ફેસ કે બોડી ટ્રીટમેન્ટ કરાવ્યાં પછી પણ તે અસરકારક પૂરવાર થતી નથી.
યુવાનીમાં પ્રવેશતાં જ ફેશિયલ ટ્રીટમેન્ટ જરૂરી બની રહે છે. ત્વચાનું હાઇજીન જાળવી રાખવું એ અગત્યની બાબત છે. ટીનેજમાં પણ સ્કીન પર જમા થયેલું ઓઇલ અને તેની આડઅસરો દૂર કરવા વિવિધ પ્રકારની ફેશિયલ ટ્રીટમેન્ટ કરાવવાની જરૂર પડે છે. ઉપરાંત, સ્કીન પર થયેલા બ્લેકહેડ અને વ્હાઇટહેડને પણ દર મહિને દૂર કરવા જરૂરી છે, જેથી ખીલ જેવી સમસ્યાથી બચી શકાય. ફેશિયલ ટ્રીટમેન્ટમાં ૫થી ૭ મિનિટ માટે અપાતી હાઇ-ફ્રીક્વન્સી કિરણોની ટ્રીટમેન્ટથી બેક્ટેરીયલ ઇન્ફેક્શન, ખીલ અને ગૂમડાં થતા અટકાવી શકાય છે. આ ટ્રીટમેન્ટથી સ્કીનનાં ડાઘા જતા રહે છે અને સ્કીનને રીપેર કરવાનું કામ ઝડપથી થાય છે. યોગ્ય અને સાચી હોમ-કેરની મદદથી તમે ઘરે પણ ફેશિયલ કરી શકો છો.
ફેશિયલ મસાજ ખૂબ ફાયદાકારક સાબિત થાય છે. એક શ્રેષ્ઠ ફેશિયલ મસાજમાં સ્લો, રીધમીક અને લીફ્ટિંગ મુવમેન્ટ જરૂરી છે. એટલે કે, ધીમેથી, એક સરખા હળવા ભારથી ચહેરાની ચામડીને ઉપરની તરફ ખેંચી મસાજ કરવાથી અસકારક ફેશિયલ મસાજ થાય છે. ફાસ્ટ અને ખૂબ પ્રેશર આપીને થતા મસાજ નુકશાન કરે છે. ત્વચાની જે સૌથી બહારનું લેયર હોય છે તેમાં રહેલા ડેડ સેલ્સ તેની જાતે જ ખરી જતા હોય છે. આ પ્રક્રિયા લગભગ ૨૨-૨૫ દિવસની હોય છે. જેમ, જેમ ઉંમર વધે છે, તેમ આ પ્રક્રિયા ધીમી પડે છે અને તેના કારણે ત્વચા ડલ લાગવા લાગે છે. ત્રીસીમાં પ્રવેશ્યા પછી જો દર ૨૫ દિવસથી એક મહિનાની અંદર ફેશિયલ કરવામાં આવે તો ડેડ સેલ્સ નિકળી જાય છે અને ત્વચા પર ગ્લો આવે છે. ફેશિયલ મસાજથી લીમ્ફેટિક ડ્રેનેજ પ્રક્રિયામાં પણ સુધારો થાય છે. લીમ્ફ એ એક પ્રકારનું પ્રવાહી ટોક્સીન છે જે સ્ટ્રેસ, દવાઓ, જંક ફૂડ, ઓછી ઊંઘ જેવા કારણોથી વધુ ઉત્પન્ન થાય છે, જેને કારણે આપણી સ્કીન ડલ દેખાય છે.
ફેશિયલ કરાવતી વખતે ગળાના ભાગમાં ખાસ મસાજ કરાવવું જરૂરી છે કારણ કે ત્યાં એજિંગની અસર સૌથી પહેલાં થાય છે.
ફેરફાર કરાયાની છેલ્લી તારીખ : 4/24/2020