હોમ પેજ / ઇ-ગવર્નન્સ(શાસન) / ડિજિટલ પેમેન્ટ / એટીએમ રોકડ આપવા સિવાયનો ઉપયોગ
વહેંચો
Views
  • સ્થિતિ ફેરફાર કરવા માટે ખોલો

એટીએમ રોકડ આપવા સિવાયનો ઉપયોગ

એટીએમ રોકડ આપવા સિવાય પણ અનેક કામ કરે છે

હજી ઘણાં લોકો માટે એટીએમ માત્ર ઈમર્જન્સીમાં પૈસા ઉપાડવા કે બેલેન્સ જાણવાના સાધનથી વિશેષ કંઈ નથી. જોકે એટીએમની સુવિધા શરૂ થઈ ત્યારથી અત્યાર સુધીમાં તેમાં અનેક ક્રાંતિકારી અને ઉપયોગી ફેરફાર થયા છે. હાલના આધુનિક એટીએમ એક સંપૂર્ણ બેન્કની ગરજ સારે છે. તાજેતરમાં જ રિઝર્વ બેન્ક ઓફ ઈન્ડિયાએ પણ બેન્કોને એટીએમના માધ્મયથી બેન્કિંગની મોટાભાગની સેવાઓ ઉપલબ્ધ બનાવવા નિર્દેશ આપ્યો છે. જેને પગલે ઘણી બેન્કોના એટીએમની મદદથી તમે રેલ્વે ટિકટ, વીજળી બિલ, ટેલિફોન બિલ, ગેસ બિલ, ચેક બુકની રિક્વેસ્ટ, બેન્ક સ્ટેટમેન્ટ જેવી સુવિધાઓ મેળવી શકશો.

પર્સનલ લોન માટે અરજી કરો

નાની રકમની પર્સનલ લોન લેવા માટે હવે તમારે બેન્કમાં જવાની કે બેન્કના કર્મચારીને ફોન કરવાની જરૂર નથી. ખાનગી ક્ષેત્રની કેટલીક બેન્કો એટીએમનો ચૂકવણીના પોઈન્ટ તરીકે ઉપયોગ કરી ગ્રાહકોને પ્રી-અપ્રૂવ્ડ લોનની સુવિધા પૂરી પાડે છે. લોનની રકમ ગ્રાહકની ટ્રાન્ઝેક્શનનો ઈતિહાસ, ખાતાંનું બેલેન્સ, ખાતામાં જમાં થતું વેતન તથા ક્રેડિટ અને ડેબિટ કાર્ડ દ્વારા થતી ચૂકવણીની ગણતરીને આધારે નક્કી થાય છે.

ફિક્સ્ડ ડિપોઝિટ મૂકો અથવા ઉપાડો

એટીએમ દ્વારા તમે તમારી બેન્કમાં ફિક્સ્ડ ડિપોઝિટ મૂકી શકો છો. આ માટે એટીએમના ઓપન ફિક્સ્ડ ડિપોઝિટ મેનુમાં જઈ ફિક્સ્ડ ડિપોઝિટનો સમય તથા રકમ લખવા ઉપરાંત અન્ય જરૂરી વિગતો ભરી કન્ફર્મ કરવાનું રહે છે.

રોકડ ટ્રાન્સફર કરો

જો તમારી પાસે નેટબેન્કિંગની સુવિધા ના હોય તો તમે એટીએમની મદદથી તમારા ખાતામાંથી અન્ય બેન્કના ખાતામાં રોકડ ટ્રાન્સફર કરી શકો છો. આ માટે તમારે જે ખાતામાં રકમ ટ્રાન્સફર કરવાની હોય તે ખાતાની નોંધ ઓનલાઈન અથવા બેન્કની શાખામાં કરાવવાની રહે છે. એક દિવસમાં  40,000 જેટલી રકમ ટ્રાન્સફર કરી શકાય છે.

મોબાઈલ રિચાર્જ

મોટાભાગના મોબાઈલ ઓપરેટર્સની પ્રીપેડ સર્વિસિસ એટીએમ દ્વારા રિચાર્જ કરાવી શકાય છે. આ જ પ્રમાણે તમે તમારા મિત્રો કે પરિવારના સભ્યોના મોબાઈલ ફોન પણ રિચાર્જ કરાવી શકો છો. આ માટે એટીએમના મેનુમાં મોબાઈલ રિચાર્જ સિલેક્ટ કરી મોબાઈલ નંબર એન્ટર કરો. ત્યારબાદ ફરીથી નંબર કન્ફર્મ કરી અને રિચાર્જની રકમ એન્ટર કરો.

બિલની ચૂકવણી કરો

એટીએમની મદદથી તમે ટેલિફોન, વીજળી, ગેસ તથા અન્ય બિલોની ચૂકવણી કરી શકો છો. આ માટે તમારે આ તમામ સર્વિસ પ્રોવાઈડર્સની નોંધણી બેન્કની વેબસાઈટ પર કરવાની રહે છે.

ઈન્કમટેક્સ ભરો

કેટલીક બેન્કો તેમના એટીએમ દ્વારા ઈન્કમટેક્સ ભરવાની સુવિધા પણ પૂરી પાડે છે. જેમાં એડવાન્સ ટેક્સ, સેલ્ફ એસેસમેન્ટ ટેક્સ ઉપરાંત નિયમિત આકારણી બાદના ટેક્સની બાકી રકમ ભરવાનો પણ સમાવેશ થાય છે. આ માટે તમારે બેન્કની વેબસાઈટ અથવા તો તેની શાખામાં જઈને નોંધણી કરાવવાની રહેશે. તમારા ખાતામાંથી રકમ કપાઈ ગયા બાદ એટીએમ એક યુનિક નંબર(CIN) જનરેટ કરશે. તેના 24 કલાક પછી તમે બેન્કની વેબસાઈટ પર જઈ CINની મદદથી ચલણની પ્રિન્ટ કાઢી શકશો.

રેલ્વે ટિકિટ બૂકિંગ

એસબીઆઈ તથા પંજાબ નેશનલ બેન્ક જેવી કેટલીક સરકારી બેન્કો કેટલાંક પસંદગીના રેલ્વે સ્ટેશનોએ રેલ્વે ટિકિટ બૂકિંગની પણ સુવિધા પૂરી પાડે છે. હાલના તબક્કે માત્ર લાંબા અંતરની મુસાફરીની ટિકિટો જ બૂક કરાવી શકાય છે.

રોકડ જમાં કરાવો

ઘણી બેન્કોએ એટીએમ કિઓસ્કની સાથે જ કેશ ડિપોઝિટ મશિન પણ મુક્યાં છે. જેમાં એક સમયે રૂ.49,000 સુધીની રોકડ જમાં કરાવી શકાય છે. તેમાં રૂ. 100, 500 અને 1,000ની ચલણી નોટો સ્વીકારાય છે.

વીમાનું પ્રીમિયમ ભરો

એલઆઈસી, એચડીએફસી લાઈફ તથા એસબીઆઈ લાઈફ જેવી વીમા કંપનીઓએ એટીએમ દ્વારા પ્રીમિયમની ચૂકવણી માટે બેન્કો સાથે જોડાણ કર્યું છે. આ માટે તમારે તમારી વીમા પોલિસીનો નંબર યાદ રાખવો જરૂરી છે. એટીએમના મેનુમાં ‘બિલ પે’ વિકલ્પ પસંદ કરી તમારી વીમા કંપની પસંદ કરો. ત્યારબાદ પોલિસી નંબર તથા જન્મ તારીખ અથવા મોબાઈલ નંબર એન્ટર કરો. આટલું કર્યા બાદ પ્રીમિયમની રકમ એન્ટર કરી તેને કન્ફર્મ કરો.

આમાંથી કેટલાંક કામો જેમ કે રોકડ ટ્રાન્સફર કરવી, બિલની ચૂકવણી, રેલ્વે ટિકિટ બૂક કરવી કે પછી વીમાનું પ્રીમિયમ ભરવું વગેરે માટે હવે એટીએમ સુધી જવાની પણ જરૂર નથી. આ કામો હવે નેટબેન્કિંગ અને મોબાઈલ બેન્કિંગથી પણ કરી શકાય છે.

સ્ત્રોત: નવગુજરાત સમય

નેવીગેશન
Back to top